ಬೆಂಗಳೂರಿನಲ್ಲಿ 'ಉಬರ್'ನಿಂದ ಬೃಹತ್ ಕಚೇರಿ ಸ್ಥಾಪನೆ, 12 ಸಾವಿರ ಮಂದಿಯಿಂದ ಏಕಕಾಲಕ್ಕೆ ಕೆಲಸ

ಜಾಗತಿಕ ರೈಡ್-ಹೇಲಿಂಗ್ ದೈತ್ಯ 'ಉಬರ್' ಭಾರತದ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ತನ್ನ ಕಾರ್ಯಾಚರಣೆಯನ್ನು ಬೃಹತ್ ಮಟ್ಟದಲ್ಲಿ ವಿಸ್ತರಿಸುತ್ತಿದೆ. ನಗರದ ಪ್ರಮುಖ ಐಟಿ ಕಾರಿಡಾರ್ ಆಗಿರುವ ಹೊರವರ್ತುಲ ರಸ್ತೆಯ ಬೆಳ್ಳಂದೂರಿನಲ್ಲಿರುವ 'ಪ್ರೆಸ್ಟೀಜ್ ಲೇಕ್‌ಶೋರ್ ಡ್ರೈವ್' ಟೆಕ್ ಪಾರ್ಕ್‌ನಲ್ಲಿ ಉಬರ್ ಬರೋಬ್ಬರಿ 1.13 ಮಿಲಿಯನ್ ಚದರ ಅಡಿ (11.30 ಲಕ್ಷ ಚ.ಅಡಿ) ಕಚೇರಿ ಸ್ಥಳವನ್ನು ಬಾಡಿಗೆಗೆ ಪಡೆದಿದೆ.

ಈ ಕುರಿತು 'ಬೆಂಗಳೂರು ರಿಯಲ್ ಎಸ್ಟೇಟ್' ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಏಪ್ರಿಲ್ 2ರಂದು ಮಾಡಿರುವ ಪೋಸ್ಟ್‌ನಲ್ಲಿ ಉಬರ್ ಲೋಗೋ ಹೊಂದಿರುವ ಆಧುನಿಕ ಕಚೇರಿ ಕ್ಯಾಂಪಸ್‌ನ ಚಿತ್ರವನ್ನು ಹಂಚಿಕೊಳ್ಳಲಾಗಿದೆ.

ಐಟಿ ರಾಜಧಾನಿಯಲ್ಲಿ ಉಬರ್‌ನ ಹೆಜ್ಜೆಗುರುತು

ಒಂದೇ ಬಾರಿಗೆ 1.13 ಮಿಲಿಯನ್ ಚದರ ಅಡಿ ಜಾಗವನ್ನು ಗುತ್ತಿಗೆಗೆ ಪಡೆದಿರುವುದು, ಇತ್ತೀಚಿನ ದಿನಗಳಲ್ಲಿ ಬೆಂಗಳೂರಿನ ರಿಯಲ್ ಎಸ್ಟೇಟ್ ವಲಯದಲ್ಲಿ ನಡೆದ ಅತಿದೊಡ್ಡ ಕಚೇರಿ ಗುತ್ತಿಗೆ ಒಪ್ಪಂದಗಳಲ್ಲಿ ಒಂದಾಗಿದೆ. ಅಂದಾಜು 10,000 ದಿಂದ 12,000 ಉದ್ಯೋಗಿಗಳಿಗೆ ಸ್ಥಳಾವಕಾಶ ಕಲ್ಪಿಸಬಲ್ಲ ಈ ಬೃಹತ್ ಕಚೇರಿಯು, ಭಾರತದ ಟೆಕ್ ಪ್ರತಿಭೆಗಳ ಕಾರ್ಯಕ್ಷೇತ್ರ ಎನಿಸಲಿದೆ. ಬೆಳ್ಳಂದೂರು ಕೆರೆಯ ಸಮೀಪ 90 ಎಕರೆ ವಿಸ್ತೀರ್ಣದಲ್ಲಿ ತಲೆ ಎತ್ತುತ್ತಿರುವ ಗ್ರೇಡ್-ಎ (Grade-A) ದರ್ಜೆಯ ಈ ಪ್ರತಿಷ್ಠಿತ 'ಪ್ರೆಸ್ಟೀಜ್ ಲೇಕ್‌ಶೋರ್ ಡ್ರೈವ್' ಟೆಕ್ ಪಾರ್ಕ್, ಪರಿಸರ ಸ್ನೇಹಿ ವ್ಯವಸ್ಥೆಗಳೊಂದಿಗೆ ಅತ್ಯಾಧುನಿಕ ಮೂಲಸೌಕರ್ಯಗಳನ್ನು ಹೊಂದಿದೆ.

ಕಚೇರಿ ಸ್ಥಳಗಳ ಬಳಕೆಯಲ್ಲಿ ಬೆಂಗಳೂರಿಗೆ ಅಗ್ರಸ್ಥಾನ

ಉಬರ್‌ನ ಈ ಬೃಹತ್ ಒಪ್ಪಂದವು 2026ರ ಮೊದಲ ತ್ರೈಮಾಸಿಕದಲ್ಲಿ (Q1 2026) ಕಚೇರಿ ಸ್ಥಳಗಳ ಬಳಕೆಯಲ್ಲಿ ಬೆಂಗಳೂರು ಅಗ್ರಸ್ಥಾನ ಕಾಯ್ದುಕೊಳ್ಳಲು ಪ್ರಮುಖ ಕಾರಣವಾಗಿದೆ. ಇತ್ತೀಚಿನ ವರದಿಗಳ ಪ್ರಕಾರ, ಈ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಬೆಂಗಳೂರು ಬರೋಬ್ಬರಿ 5.3 ಮಿಲಿಯನ್ ಚದರ ಅಡಿಗಳಷ್ಟು ಕಚೇರಿ ಸ್ಥಳವನ್ನು ಗುತ್ತಿಗೆಗೆ ನೀಡುವ ಮೂಲಕ ದೇಶದ ಇತರ ಪ್ರಮುಖ ನಗರಗಳನ್ನು ಹಿಂದಿಕ್ಕಿದೆ. ತಂತ್ರಜ್ಞಾನ ಕಂಪನಿಗಳು ಮತ್ತು ಜಾಗತಿಕ ಸಾಮರ್ಥ್ಯ ಕೇಂದ್ರಗಳ ನಿರಂತರ ಬೇಡಿಕೆಯಿಂದಾಗಿ, ಜಾಗತಿಕ ಟೆಕ್ ಸಂಸ್ಥೆಗಳಿಗೆ ಬೆಂಗಳೂರು ಮೊದಲ ಆಯ್ಕೆಯಾಗಿ ಮುಂದುವರಿದಿರುವುದನ್ನು ಈ ಅಂಕಿಅಂಶಗಳು ದೃಢಪಡಿಸಿವೆ.